Италийн аяллын хөлөг онгоцыг Сингапурын боомтод нэвтрэхийг зөвшөөрчээ
Сингапурын эрх баригчид Италийн “Costa Fortuna” аяллын хөлөг онгоцыг мягмар гарагт боомтдоо нэвтрэхийг зөвшөөрчээ.Өмнө нь Малайз, Тайландын эрх баригчид уг хөлөг онгоц дээр Италийн 60 гаруй иргэн байгаатай холбоотойгоор боомтууддаа нэвтрэхийг зөвшөөрөөгүй байна.
“Сингапур руу явахаасаа өмнө хөлөг онгоцны зорчигчид бүгд гуравдугаар сарын 3-нд эмнэлгийн үзлэгт хамрагдсан. Одоогийн байдлаар зорчигчдын биеийн байдал муудсан тухай мэдээлэл ирээгүй байна. Хөлөг онгоцны эмч нар мөн зорчигчдын эрүүл мэндийг хянаж, шалгаж байна. Үүнээс гадна, боомтод ирсний дараа эрэг рүү буулгахаас өмнө бүх хүн шаардлагатай шалгалтын журмыг мөрдөж, үзлэгт хамрагдана” гэж Сингапурын Далайн болон боомтын захиргаа, Аялал жуулчлалын зөвлөлөөс гаргасан хамтарсан мэдэгдэлд дурджээ.
