Имарт худалдааны төв махны үнээ нэмжээ
Уржигдар буюу энэ долоо хоногийн мягмар гарагийн өглөө манай улсад COVID-19-ийн анхны тохиолдол бүртгэгдсэнтэй холбоотой иргэд сандралдаж хүнсний зах, худалдааны төвүүдийг “хоосолж” махны үнэ кг тутамдаа 500-3000 төгрөгөөр нэмэгдэж, үдээс өмнө ихэнх захад шинэ мах дуусссан байсныг бид өмнө мэдээлж байсан. ХХААХҮ-ийн сайд Ч.Улаан хоёр ч удаа мэдээлэл хийхдээ хүнсний нөөц хангалттай байгаа тул зохиомол хомсдол үүсгэж, үнэ хөөрөгдөхгүй байхыг сануулж, жигд тогтвортой, хүртээмжтэй байхад зохицуулалт хийхээ мэдэгдэж байсан ч Имарт худалдааны төвийн Хан-Уул дүүргийн салбарт гэхэд өнөөдөр үхрийн гуяны цул мах 19.150, үхрийн хааны цул мах 18.100, булчин мах 20.000 хүрээд байна. "Гадаадын сүлжээ дэлгүүр танайхыг л үнээ нэмээгүй байх гээд зориод ирлээ. Захын наймаачин шиг амандаа орсон үнээ бичээд тавьчихсан байх шив дээ. Ёстой урам хугарлаа" хэмээн бухимдах үйлчлүүлэгчийн хариуд худалдагч "Манай удирдлагууд л мэднэ шүү дээ эгч ээ" хэмээн учирлаж байлаа. Тус худалдааны төвд бусад өргөн хэрэглээний бараа бүтээгдэхүүний үнэ хэвэндээ, ачаалал харьцангуй бага, ариутгал цэвэрлэгээ сайн хийгдэж байсан юм. Түүнчлэн УОК-ын гаргасан шийдвэрийн дагуу тухайн дэлгүүрийн цахилгаан барааны тасаг хаагдсан байлаа.
Засгийн газрын мэдээ сонин
