Цэцэрлэг суманд 19 мянган толгой мал хорогджээ

Тус суманд энэ сарын эхний арав хоногт ихэнх нутгаар жиндүү, хүйтэн, салхи шуургатай 3 удаа цас орсон байна. Өнөөдрийн байдлаар цасны дундаж зузаан 60-65 см, гуу жалга хунгарласан газраа 100-150 см, хөрийн зузаан 15-35 см, цасны нягт 0,25-0,28 г/см3 хатуурсан зузаан цастайн улмаас “цагаан зуд”-ын нөхцөл бүрдсэн гэнэ. Цэцэрлэг сум 7 багтай, 5009 хүн ам, 836 малчин өрх, 285 хот айл хаваржиж байна. Цагаан-Уул сум болон Завхан аймгийн сумдад отроор 25 өрхийн 81 хүн, үүнээс, хүүхэд 29, өндөр настан 5 байгаа бөгөөд нийт 15858 толгой мал оторлож байгаа ажээ.