БХБ-ЫН САЙД Ц. ДАВААСҮРЭН: 513 СУРГУУЛЬ, 447 ЦЭЦЭРЛЭГИЙГ ПАСПОРТЖУУЛАХ ШААРДЛАГАТАЙ
Барилга, хот байгуулалтын салбарт хэрэгжүүлж буй бодлогын арга хэмжээ, төсөл хөтөлбөрүүд, үйл ажиллагааны талаар өнөөдөр Барилга, хот байгуулалтын сайд Ц.Даваасүрэн Төрийн ордноос мэдээлэл хийлээ.
Тодруулж хэлбэл Барилгын тухай хуульд нэмэлт өөрчлөлт оруулах хуулийн төсөл боловсруулах ажлыг эхлүүлээд байна. Мөн Орон сууцны ашиглалтын тухай хуулийн шинэчилсэн найруулгын төсөлд холбогдох яамдаас ирүүлсэн саналыг тусган, өргөн мэдүүлэхээр ажиллаж байна.Хууль шинэчилэн баталсанаар орон сууцны ашиглалтын хэвийн үйл ажиллагааг хангах оновчтой тогтолцоог бүрдүүлэх, орон сууцны дундын өмчлөлийн эд хөрөнгө, инженерийн шугам сүлжээний өмчлөл, эзэмшил, ашиглалт, хамгаалалт, үйлчилгээтэй холбогдсон харилцааг зохицуулж, иргэдийн эрүүл, аюулгүй орчинд амьдрах нөхцлийг хангах юм.
