АТГ: “ХОМ-ийн бүртгэлийн хугацаа 15-нд дуусна”

АТГ-ын мэдээгээр хөрөнгө орлогын мэдүүлгийн бүртгэл улсын хэмжээнд өнөөдрийн байдлаар 94.5 хувьтай байна. 

Нийтийн албан тушаалтнууд Авлигын эсрэг хуульд заасны дагуу жил бүрийн 02 дугаар сарын 15-ны дотор өөрийн болон гэр бүлийн гишүүдийн хөрөнгө, орлогын мэдүүлгийг үнэн зөв гаргаж бүртгүүлэх үүрэгтэй бөгөөд хуулийн энэ хугацаа дуусахад 5 хоног үлдээд байна.

Одоогийн байдлаар 39587 мэдүүлэг гаргагч хөрөнгө оруулгын мэдүүлгээ https://meduuleg.iaac.mn цахим хуудсаар шинэчлэн мэдүүлээд байгаа аж. Үүнд БХБЯ, ЭХЯ, Үндсэн хуулийн цэц, Архивын ерөнхий газар, Харилцаа холбооны зохицуулах хороо, НДЕГ, Соёл урлагийн газар, ЦЕГ, ОБЕГ, Архангай, Дундговь аймгийн Засаг даргын Тамгын газраас мэдүүлгээ 100 хувь авч дууссан дүн мэдээтэй байна. 

АТГ-т мэдүүлгээ бүртгүүлэх үүрэгтэй төрийн өндөр болон бусад 290 гаруй албан тушаалтны 179 нь мэдүүлгээ гаргаж бүртгүүлжээ. Тэдгээрийн 39 нь УИХ, Засгийн газрын гишүүн, 10 нь яамдын Төрийн нарийн бичгийн дарга, 20 нь агентлагийн дарга, 35 нь Элчин сайд, консул, 75 нь бусад албан тушаалтан байна. АТГ хөрөнгө, орлогын мэдүүлэг, цахим системийн үйл ажиллагаатай холбоотой  заавар зөвлөмж өгч ажлын өдрүүдэд уртасгасан цагаар, энэ сарын 15-ныг хүртэлх амралтын бямба гаригт ажиллах тул хуулийн хугацаанд мэдүүлгээ бүртгүүлж, хуульд заасан үүргээ хэрэгжүүлэхийг тус газраас анхааруулж байна.