"Хүчит шонхор", "Далай ээж" захын түрээслэгчид Өргөдлийн байнгын хороонд ханджээ
Коронавирусийн халдвараас урьдчилан сэргийлэх зорилгоор өндөржүүлсэн бэлэн байдалд шилжүүлсэнтэй холбоотойгоор Засгийн газраас бизнес эрхлэгчдийг дэмжих шийдвэр гаргасан. Тухайлбал, өндөржүүлсэн бэлэн байдлын хугацаанд түрээсийн төлбөрөө бууруулсан зах, худалдаа, үйлчилгээний төвүүдийн түрээсийн орлогод ногдуулсан татварыг нэг удаа чөлөөлөх хуулийн төслийг УИХ-д өргөн барихаар болсон юм. Энэ нь зөвхөн түрээсийн төлбөрөө бууруулсан аж ахуйн нэгжүүдэд л хамааралтай гэдгийг Сангийн сайд Ч.Хүрэлбаатар онцлон хэлсэн. Үүний дагуу зарим зах, худалдааны төвүүд түрээсийн төлбөрөө бууруулсан. Харин "Хүчит шонхор", "Далай ээж" зах түрээсээ бууруулахгүй байна хэмээн түрээслэгчид нь УИХ-ын Өргөдлийн байнгын хороонд хандсан гэдгийг тус Байнгын хорооны дарга М.Оюунчимэг хэллээ.
