Худалдааны алдагдал сүүлийн 6 жилд анх удаа буурчээ
БНХАУ-ын бараа бүтээгдэхүүнд татвар ногдуулснаар АНУ-ын худалдааны тэнцвэрийн алдагдал сүүлийн 6 жилийн хугацаанд анх удаа ихээхэн хэмжээгээр буурчээ. Энэ тухай АНУ-ын Худалдааны яамны мэдэгдэлд дурдсан байна.
Өнгөрсөн онд худалдааны алдагдал 1.7 хувиар буурч, 617 тэрбум ам.доллар хүрчээ. 2018 онд энэ үзүүлэлт 628 тэрбум ам.долларт хүрснээр сүүлийн хэдэн арван жилийн хугацаанд харуулсан хамгийн өндөр үзүүлэлт байсан аж. Худалдааны тэнцвэрийн алдагдал ийнхүү буурсныг Хятадын бараа бүтээгдэхүүнд ногдуулсан АНУ-ын татвартай холбон үзэж байна.
АНУ, БНХАУ-ын худалдааны гэрээний эхний үе шатны хэлэлцээрт гарын үсэг зурах ёслол Вашингтонд 1 дүгээр сарын 15-нд болсон юм. Гарын үсэг зурах ёслолд АНУ-ын Ерөнхийлөгч Дональд Трамп, БНХАУ-ын Төрийн зөвлөлийн Шадар сайд Лю Хэ нар оролцсон юм.
