Орхон аймагт 4.9 магнитудын хүчтэй газар хөдөлжээ

Орхон аймгийн Жаргалант сумаас баруун урагшаа зургаан км газарт өнөөдөр 15.16 цагт 4.9 магнитудын хүчтэй газар хөдөлжээ. Газар хөдлөлтийн чичиргээ хотын төвд мэдрэгдэж иргэд "Эрдэнэт үйлдвэр" ТӨҮГ-ын тэсэлгээтэй андуурсан байна. Уулын тэсэлгээ баасан гараг бүрийн 15.00 цагийн орчимд болдог аж. Газар хөдлөх үеэр таван давхар орон сууцны хорооллын дөрвөн давхарт чичиргээ мэдрэгджээ. Аймгийн ОБГ орон сууцны хорооллуудад шалгалт хийж байгаа юм байна. 

Үүнтэй холбогдуулан мэдээлэхэд, сүүлийн үед Монголд газар хөдлөлтийн тохиолдол нэмэгдэж байгааг судлаачид хэлж байгаа юм. Өөрөөр хэлбэл, 2005 оноос  өмнө жилдээ 100 гаруй удаагийн газар хөдлөлт мэдрэгддэг байсан бол өдгөө 2000 гарчээ. Нийслэлийн хаяанд буй “Эмээлт”-д гэхэд жилд ойролцоогоор 1000 гаруй удаа газар хөдлөлт мэдрэгддэг байна.