Ховдод бороо орж Увсад цас оров
Хүйтний ам цаашилж, хөхүүрийн ам наашилж, урин хавартай золгосон энэ өдрүүдэд өнөө жилийн анхны бороо Ховд аймагт оржээ. Гуравдугаар сарын 23-ны 23.00 цагийн орчимд тус аймагт бороо зөөлөн шивэрч, гурван цаг шахам үргэлжлэн орж, 0.3 мл хур тунадас буув.
Урьдчилан тааж тааварлах, аминчлан итгэхэд амаргүй улирал бол хавар. Ямар сайндаа л “Ганган хүүхний үхэл хавар, намар” гэх вэ. Хаврын тэнгэр шиг ааштай гэх нь ч бий. Тэгвэл үүнийг батлах гэсэн шиг өчигдөр Увс аймагт цас оржээ.
