Нэр дэвшигчдийн сурталчилгааны самбарыг сүйтгэж байна

Зургаадугаар сарын 2-ны өдөр 2020 оны УИХ-ын сонгуулийн сурталчилгаа албан ёсоор эхэлснээс хойш нэр дэвшигчдийн сурталчилгааны самбарыг  сүйтгэх явдал удаа дараа гараад байна. Тухайлбал 29-р тойрогт бие даан нэр дэвшигч Ж. Эрхэмбаатар, 26-р тойрогт бие даан нэр дэвшигч С. Мөнхчулуун, 26-р тойрогт бие даан нэр дэвшигч М. Нарантуяа , 26-р тойрогт ардчилсан намаас нэр дэвшигч С. Эрдэнэ зэрэг хүмүүсийн сурталчилгааны самбарыг цоолж, урсан байна. Энэ талаар М. Нарантуяа өөрийн цахим хуудаснаа “Ингэлээ гээд юу ч өөрчлөгдөхгүй шүү дээ!!! Зургийг маань урж чадах ч зоригийг минь мохоож чадахгүй” гэжээ.

 Сонгуулийн тухай хуулийн 77.15-т “Гудамж талбайд байрлуулсан сонгуулийн сурталчилгааны зурагт болон ухуулах хуудсыг хууль бусаар устгах, бохирдуулахыг хориглоно” хэмээн заасан байдаг. Мөн энэ хуулийн 77.15-д заасныг зөрчсөн аливаа этгээдийг нэг сарын хөдөлмөрийн хөлсний доод хэмжээг зургаагаас найм дахин нэмэгдүүлсэнтэй тэнцэх хэмжээний төгрөгөөр торгоно хэмээн заажээ.
Б. ЦэнгэлмааТӨР.МН