Их Британид хөнгөн өвчтөнүүдэд өөрийгөө тусгаарлахыг зөвлөнө
Их Британид коронавирусний халдварын тархалтыг хязгаарлах үүднээс амьсгалын замын халдварт өвчний ямар нэгэн “хөнгөн” шинж тэмдэг илэрсэн эсвэл халуурсан хүмүүст өөрийгөө тусгаарлахыг зөвлөхөөр төлөвлөж байна.
Их Британийн Засгийн газрын Эрүүл мэндийн ахлах зөвлөх, профессор Крис Уиттийн хэлснээр, уг зөвлөмж ойрын 10-14 хоногийн дотор хэрэгжиж эхлэх бөгөөд тусгаарлах хугацаа долоо хоног үргэлжлэх төлөвтэй байна. Тус улсад өнөө өглөөний байдлаар коронавирусний халдварын улмаас таван хүн нас баржээ.
Их Британийн Гадаадын хэргийн яам Итали руу зорчихгүй байхыг британичуудад анхааруулж, Италиас ирсэн иргэдийг 14 хоног өөрийгөө тусгаарлахыг зөвлөсний дараа дээрх мэдээлэл гарчээ. Италийн эрх баригчид мягмар гаргаас эхлэн хөл хорионы арга хэмжээнүүдийг орон даяар чангатгасан юм. Тус улсад коронавирусний халдварын 9100 гаруй тохиолдол бүртгэгдэж, 460 гаруй хүн нас барсан байна.
Их Британид даваа гаргийн оройны байдлаар коронавирусний халдвар авсан хүний тоо 319-т хүрсэн нь өмнөх өдрийнхөөс 46-гаар нэмэгджээ.
Montsame.mn
