"iPhone"-ийн өндөр үнэ тарифтай хамааралгүй
"iPhone" утасны хамгийн сүүлийн үеийн загварууд өмнөх загваруудаасаа үнэтэй болсон нь ерөнхийлөгч Дональд Трампын өргөн цар хүрээтэй тарифын төлөвлөгөөтэй холбоогүй гэдгийг "Apple"-ын гүйцэтгэх захирал Тим Кук хэллээ. Тэрбээр тарифын нөлөөллийн талаар анх удаа ил тод ам нээсэн нь энэ.
"Apple" компани энэ сарын эхээр "iPhone 17 Pro" загварынхаа үнийг 100 ам.доллараар нэмсэн. Мөн "Plus"-ыг орлуулсан "Air" загварыг илүү өндөр үнээр танилцуулсан юм.
Тарифын нэмэгдлийг тойрч гарахын тулд "Apple" компани нийлүүлэлтийн сүлжээгээ Энэтхэг, Вьетнам зэрэг хямд тарифтай орнууд руу төрөлжүүлсэн. Тус компани бүтээгдэхүүнийхээ ихэнхийг Хятадад үйлдвэрлэсээр ирсэн түүхтэй. Тарифтай холбоотойгоор энэ оны хоёрдугаар улиралд "Apple" 800 сая ам.долларын хохирол амсчээ. Гэсэн ч энэ нь бүтээгдэхүүнийхээ үнийг нэмсэн шалтгаан биш гэдгийг Тим Кук хэлжээ.
ЭХ СУРВАЛЖ: CNBC
